Wèpsait i pòrtal di inskripshon di e trayekto Rib’e Lugá a keda lansá

Wèpsait i pòrtal di inskripshon di e trayekto Rib’e Lugá a keda lansá

Willemstad – Ministerio di Hustisia, den kolaborashon ku Ministerio di Desaroyo Sosial, Labor i Bienestar, ta informá ku e wèpsait  i e portal di inskripshon di e trayekto Rib’e Lugá a keda lansá ofisialmente riba 1 di mei 2026.

E trayekto Rib’e Lugá ta un trayekto di registrashon i legalisashon práktiko i fásil. E ta duna personanan indokumentá na Kòrsou e posibilidat pa registrá pa un pèrmit di estadia temporal, basta ku nan ta kumpli ku e kondishonnan.

Ku e trayekto aki, gobièrnu ke haña un mihó bista riba e grupo di personanan indokumentá na Kòrsou i kontribuí na un maneho di migrashon mas strukturá i prepará pa futuro.

Minister di Hustisia, Shalten Hato, ta enfatisá:
“Ku Rib’e Lugá nos ta dal un paso importante den direkshon di mas órden i klaridat, pero mas importante ainda, humanidat. Nos ta duna hende ku ya ta forma parti di nos komunidat e oportunidat pa regla nan situashon di un manera honesto i transparente. Ku e lansamentu di e wèpsait , nos ta hasi e proseso aksesibel pa tur hende. Nos ta kontentu di mira ku djis despues di e ‘go-live’ di e wèpsait, ya tin hopi interes pa e trayekto di legalisashon.”

Pa por bini na remarke, personanan mester por mustra ku nan tabata na Kòrsou promé ku 13 di novèmber 2025 i ku nan ta aki ainda. Ademas, tin otro kondishonnan ku tambe ta apliká .

Personanan ku ta bini na remarke por registrá nan mes via www.ribeluga.cw. Riba e wèpsait aki tin tur informashon nesesario pa nan mes hasi un petishon, inkluso e kondishonnan, dokumentonan nesesario i e stapnan di e proseso. E informashon ta disponibel den kuater idioma, p’asina e ta aksesibel pa un grupo amplio.

Registrashon ta posibel a base di tres propósito di estadia:

• Empleo;
• Negoshi propio / empresario independiente;
• Re-unifikashon di famia òf formashon di famia.

E ministerionan ta invitá tur persona ku ta kumpli ku e kondishonnan pa registrá nan mes. E proseso ta simpel i aksesibel, ku atenshon spesial pa muchanan indokumentá,  i bo por registrá sin miedu

Pa esnan ku tin mester di yudansa ku registrashon, tin asistensia disponibel via un kantidat di asina yamá “Trusted Partners”. E organisashonnan aki lo duna guia sin kosto durante e proseso di registrashon.

Pa e motibu ei, no ta nesesario pa hasi uso di intermediario pa entregá un petishon. Registrashon ta tuma lugá direktamente via e wèpsait ofisial i ta kompletamente online.

Pa mas informashon i pa registrá: www.ribeluga.cw.